I refuzohet ankimimi i dytë nga drejtësia braziliane, Ervin Mata drejt ekstradimit në Shqipëri

28 Tetor 2026, 16:56Aktualitet SHKRUAR NGA REDAKSIA VOX

I refuzohet ankimimi i dytë nga drejtësia braziliane, Ervin Mata drejt

Ervin Mata ka marrë një tjetër përgjigje negative nga drejtësia braziliane në përpjekjen për të kundërshtuar ekstradimin e tij drejt Shqipërisë.

Gjykata Supreme Federale e Brazilit ka refuzuar të shqyrtojë ankimin e dytë të paraqitur nga avokatët e tij, duke lënë të pandryshuar vendimin e mëparshëm në favor të ekstradimit.

Ky vendim u mor pak ditë më parë, pikërisht më 20 tetor 2026, në mënyrë unanime nga trupi i parë i kësaj gjykate. Relator i çështjes ishte ministri Alexandre de Moraes.

Në arsyetimin e saj, gjykata vlerësoi se argumentet e paraqitura nga mbrojtja nuk përbënin arsye të mjaftueshme për të rihapur çështjen apo për të vënë në pikëpyetje vendimin e mëparshëm. Avokatët e Matës kishin ngritur pretendime që lidhen me kërkesën e tij për azil në Brazil, një hetim policor në këtë shtet, si dhe me juridiksionin e autoriteteve shqiptare për çështjen në fjalë.

Vendimi shënon një tjetër zhvillim të pafavorshëm për Matën në përpjekjet e tij ligjore kundër ekstradimit. Megjithatë, kjo nuk do të thotë se kthimi i tij në Shqipëri do të kryhet menjëherë, pasi procesi duhet të vijojë me procedurat përkatëse pranë autoriteteve braziliane.

Për realizimin e ekstradimit kërkohet gjithashtu ndërhyrja e autoriteteve ekzekutive të Brazilit dhe përmbushja e detyrimeve përkatëse nga pala shqiptare, sipas procedurave që zbatohen në raste të tilla.

Ervin Mata u arrestua në Brazil në prill të vitit 2026, gjatë një operacioni të koordinuar mes autoriteteve shqiptare dhe atyre braziliane.

Ai kërkohet nga Prokuroria e Posaçme Kundër Korrupsionit dhe Krimit të Organizuar (SPAK), në kuadër të hetimeve për një grup të dyshuar kriminal, që dyshohet se ka organizuar trafikimin e sasive të mëdha të kokainës nga Amerika Latine drejt Europës.

Sipas hetimeve të SPAK, Matës i atribuohet një rol në koordinimin e trafikut ndërkombëtar të drogës. Megjithatë, këto pretendime mbeten akuza që duhet të provohen përmes procesit gjyqësor.

Emri i tij është përmendur edhe në lidhje me ngjarjen e rëndë të 4 tetorit 2018, në zonën e ish-Bllokut në Tiranë, ku një konflikt me armë përfundoi me vrasjen e Fabian Gaxhës.


Video