LAJME TË NXEHTA/ Zbulohen gurë kontrabandë të fshehur në kontejnerët me kokainë!

 Kliko këtu për të tjera
Voxpress:

"Biznesi i vogël nuk do paguajë, tatimi mbi fitimin mbetet zero deri në 2029" - Braçe i përgjigjet PD-së për TVSH-në

1 November 2026, 17:05Biznes SHKRUAR NGA REDAKSIA VOX

"Biznesi i vogël nuk do paguajë, tatimi mbi fitimin mbetet zero

Deputeti socialist Erion Braçe ka kundërshtuar kritikat e Partisë Demokratike lidhur me ndryshimet e parashikuara në Paketën Fiskale 2027, duke mohuar se bizneset e vogla do të përballen me një barrë të re prej 21% TVSH-je.

Sipas tij, bizneset me xhiro deri në 5 milionë lekë do të përjashtohen nga detyrimi për t’u regjistruar në skemën e TVSH-së, ndërsa tatimi mbi fitimin për biznesin e vogël dhe profesionistët e lirë do të mbetet zero deri në vitin 2029.

Përmes një postimi në rrjetet sociale, Braçe ka renditur disa argumente për të shpjeguar mënyrën se si do të zbatohet regjimi i ri. Ai theksoi se bizneset me xhiro nga 5 deri në 10 milionë lekë do të regjistrohen në skemën e TVSH-së, ashtu siç janë aktualisht edhe bizneset me xhiro nga 10 deri në 14 milionë lekë.

“Jo, biznesi i vogël nuk do të paguajë Tatimin mbi Vlerën e Shtuar; as 21%! T’u themi njerëzve dhe biznesit të vogël të vërtetën”, shkruan Braçe.

Deputeti socialist argumenton se TVSH-ja është një tatim mbi konsumin, i cili paguhet nga konsumatori në momentin e blerjes së një malli apo shërbimi. Sipas tij, biznesi shërben si agjent për mbledhjen e këtij tatimi dhe më pas e derdh atë në buxhetin e shtetit.

Braçe kundërshtoi gjithashtu pretendimin se rreth 17 mijë biznese të vogla do të preken nga një barrë e re fiskale. Ai vuri në dukje se një pjesë e konsiderueshme e tyre operojnë në sektorët e shërbimeve, tregtisë dhe veçanërisht tregtisë ushqimore.

Sipas tij, ulja e TVSH-së për disa produkte nga 20% në 6%, duke nisur nga 1 janari, do të ndikojë pozitivisht te konsumi dhe aktiviteti i këtyre bizneseve.

Postimi i plotë i Erion Braçes:

“Jo, biznesi i vogël nuk do të paguajë Tatimin mbi Vlerën e Shtuar; as 21%! T’u themi njerëzve dhe biznesit të vogël të vërtetën:

1. Nuk është e vërtetë që biznesi i vogël me xhiro deri në 5 milionë lekë do të paguajë 21% TVSH; E vërteta është që ky biznes përjashtohet nga detyrimi për t’u regjistruar në regjimin e TVSH-së.

2. Nuk është e vërtetë që biznesi i vogël me xhiro nga 5 deri në 10 milionë lekë do të paguajë 21% TVSH; E vërteta është që ky biznes do të regjistrohet në regjimin e TVSH-së, siç është biznesi i vogël me xhiro 10-14 milionë lekë që është aty, i pasulmuar, i pakontrolluar, i pafalimentuar, duke punuar, prodhuar, tregtuar, arkëtuar e fituar të ardhura.

3. Nuk është e vërtetë që TVSH-ja është tatim ndaj biznesit; E vërteta është që TVSH-ja është tatim konsumi, tatim mbi konsumatorin, e paguaj unë që ble për çdo mall e shërbim që marr, tani edhe te biznesi i vogël. Biznesi, si agjent i qeverisë, e mbledh nga unë e duhet ta derdhë në buxhetin e shtetit; pra, e paguaj unë, jo biznesi, as biznesi i vogël.

4. Nuk është e vërtetë që 17 mijë biznese të vogla po sulmohen duke i regjistruar në regjimin e TVSH-së; E vërteta është që për ta funksionon e njëjta logjikë: TVSH-në e paguan konsumatori, jo biznesi. Ka edhe një të vërtetë tjetër: shumica e këtyre bizneseve janë shërbime, tregti, mbi të gjitha ushqimore; shumica e produkteve të tyre nga 1 janari kanë një TVSH të ulur nga 20 në 6%, duke ndihmuar konsumin, konsumatorin dhe xhiron e këtyre bizneseve.

5. Nuk është e vërtetë që profesionistët e lirë do të paguajnë 21% TVSH, siç nuk është e vërtetë që veç ata janë shtresë e mesme në këtë vend; E vërteta është që edhe për ta, TVSH-në do ta paguajë marrësi i shërbimeve apo mallrave prej tyre, me faturë, si të gjithë. I vetmi tatim që duhet të paguajë biznesi i vogël dhe profesionistët e lirë, si rregull, është tatimi mbi të ardhurat, tatimi mbi fitimin. Ky tatim ka qenë, është dhe do të jetë deri në 2029, zero për qind, zero lekë!”


Në përputhje me standarded JTI

Video

SHIKO KANALIN NE YOUTUBE
×