Në komisionin për të Drejtat e Njeriut dhe Mjetet e Informimit Publik, u përmend për një moment nga Jorida Tabaku edhe skandali i vjedhjes së qindra mijëra eurove të pensionistëve në Durrës, dosje ku u përmend dje edhe emri i deputetes socialiste, Etleva Budini.
Tabaku tha se është e nevojshme të merret vesh se çfarë ka ndodhur me fondet e pensionistëve.
“Çfarë ka ndodhur me vjedhjen e parave? E kemi parë atje me lekë drejtoreshën e postës së Durrësit. Ndërsa pensionistët rrinë atje e numërojnë kacidhet. Dhe ju të thoni se do ju japim bonus në prill përpara zgjedhjeve”- tha Tabaku.
Ndërkohë që socialistja, Etleva Budini mbante kokën ulur, guximin e mori kolegu i saj ngjitur, Ramion Kurti i cili për akuzat dhe skandalet e përmendura nga deputeti Agron Gjekmarkaj më herët, tha se shqiptarët i kanë votuar më 11 maj.