Ish-kryeministri Pandeli Majko ka reaguar pas deklaratave të kryetarit të Partisë Demokratike, Sali Berisha, i cili e përmendi gjatë fjalës së tij në Kuvend për projektbuxhetin e vitit 2027.
Përmes një reagimi në rrjetet sociale, Majko ironizoi Berishën, duke deklaruar se i vetmi justifikim për të është mosha dhe se edhe batutat e tij janë të “moshuara”.
“I vetmi justifikim është mosha e tij! Edhe batutat i ka të ‘moshuara’!”, shkruan Majko.
Ish-kryeministri socialist e sfidoi gjithashtu Berishën, duke e pyetur nëse në forumet e Partisë Demokratike dikush mund të flasë me të njëjtën liri si ai në Partinë Socialiste.
Majko theksoi se Berisha nuk mund t’i mundë socialistët dhe se nuk mund të përfaqësojë të ardhmen europiane të të rinjve që protestojnë.
Reagimi i plotë i Pandeli Majkos:
Berisha më paska përmendur sot në Kuvend…!
I vetmi justifikim është mosha e tij! Edhe batutat i ka të “moshuara”!
Këtë individ, e bënë lider, studentët! Zgjedhjet e tij e bënë atë, “non grata”!
E vetmja pyetje që duhet ti bëj vetes është nëse dikush në forumet e partisë së tij mund të flas si unë tek partia ime?
Socialistët një mijë herë të bien në tokë, sërish do të ringrihen!
Berisha nuk i mund dot socialistët! Ta harrojë!
Arsyja është e thjeshtë! Berisha nuk mund të jetë një ëndër për të ardhmen europiane edhe të atyre djemve e vajzave që protestojnë sot!
Askush nuk i shpëton asaj që është! Berisha më shumë se askush!
Kryetari i Partisë Demokratike, Sali Berisha, gjatë fjalës së tij në Kuvend për projektbuxhetin e vitit 2027, iu referua edhe deklaratës së ish-kryeministrit Pandeli Majko në Asamblenë e Partisë Socialiste, duke kërkuar shpjegime nga mazhoranca.
“Po denoncimi i Majkos?”, pyeti Berisha nga foltorja e Kuvendit, ndërsa paralajmëroi se do të dalin në dritë edhe çështje të tjera, duke përmendur “skena erotike” dhe duke lënë të kuptohet se disponohen informacione që ende nuk janë bërë publike.
Deklarata e Sali Berishës:
“Po denoncimi Majko, nga i jepni ju atij? Na thoni pak!
Jo, jo, ta garantoj unë ty, rri ti se ti je rishtar, mos u përziej.
Jo, jo se kaq naiv Gjinua nuk është sa të ngatërroj skenat erotike me skenat e tjera.
I keni dhe ato ju! I keni! Dhe do të dalin, ua them unë, do të dalin.
Prandaj, më mirë largohuni!