Skandal në Bruksel, interpretohet kënga nacionaliste serbe kundër Kosovës në aktivitetin zyrtar të BE-së

2026-11-16 10:16:37Aktualitet SHKRUAR NGA REDAKSIA VOX

Skandal në Bruksel, interpretohet kënga nacionaliste serbe kundër

Muzika e këngës nacionaliste serbe kundër Kosovës "Oj Kosovo, Kosovo” është interpretuar në Bruksel, në hapje të Forumit të Zgjerimit të Bashkimit Evropian, që organizohet nga Komisioni Evropian nën udhëheqjen e komisioneres për zgjerim Marta Kos.

Sipas programit në mbrëmjen hapëse më 15 nëntor ishte parashikuar të interpretonte orkestra e të rinjve të Ballkanit Perëndimor, së bashku me grupin slloven “Kapobanda”. 

Pas këtij interpretimi reagimet kanë qenë të ashpra. Kryenegociatori i Kosovës me Bashkimin Evropian, Jeton Zulfaj, ka thënë se është skandaloze dhe e papranueshme ajo që ngjau në Bruksel dhe po pret përgjigje nga komisionerja për zgjerim e Bashkimit Evropian, Marta Kos, nën udhëheqjen e të cilës po mbahet aktiviteti.

“Një këngë nacionaliste serbe, që mohon shtetësinë e Kosovës dhe që u shkrua në kohën kur kasapi i Ballkanit, Millosheviqi, po i shfuqizonte të drejtat e Kosovës dhe po e shtypte popullin tonë, u interpretua në hapje të Forumit të Zgjerimit të BE-së. Kjo është skandaloze e papranueshme. Një aktivitet i BE-së për zgjerimin nuk mund t’i japë skenë nacionalizmit serb. Komisioneres Kos ia lëmë të shpjegojë se si ndodhi kjo dhe çfarë masash do të ndërmarrë, si dhe pse Kosova, vendi me përparimin më të madh demokratik në Ballkanin Perëndimor gjatë kësaj dekade dhe plotësisht e harmonizuar me politikën e jashtme dhe vlerat e BE-së, nuk ishte ftuar”, ka shkruar Zulfaj në platformën “X”.

Ndërkohë kryenegociatori i Kosovës për dialogun me Serbinë, Agron Bajrami, ka thënë se interpretimi i muzikës së këngës nacionaliste serbe kundër Kosovës në një aktivitet zyrtar të Komisionit Evropian është e papranueshme.

“Në koncertin e hapjes së Forumit të Zgjerimit të BE-së në Bruksel, të organizuar nga Komisioni Evropian nën drejtimin e komisioneres Marta Kos, u interpretua kënga nacionaliste serbe “Oj Kosovo, Kosovo”. Ky nuk është shkëmbim kulturor. Kënga promovon pretendime të qarta politike mbi territorin e Republikës së Kosovës. Përfshirja e saj në një aktivitet zyrtar të Komisionit Evropian, kushtuar zgjerimit, unitetit dhe marrëdhënieve të fqinjësisë së mirë, është e papranueshme. Republika e Kosovës pret një sqarim të menjëhershëm nga Komisioni Evropian dhe komisionerja Kos lidhur me mënyrën se si u përzgjodh dhe u miratua ky repertor. Vlerat evropiane, marrëdhëniet e fqinjësisë së mirë dhe besueshmëria e procesit të zgjerimit të BE-së nuk mund të pajtohen me dhënien e një platforme pretendimeve irredentiste kundër një vendi që synon anëtarësimin në Bashkimin Evropian”, ka shkruar Bajrami në platformën “X”.

 

Marta Kos kërkon falje për këngën serbe në Bruksel: Nuk përfaqëson qëndrimet e BE-së

Komisionerja europiane për Zgjerim, Marta Kos, ka shprehur keqardhje për interpretimin e melodisë së këngës nacionaliste serbe “Oj Kosovo, Kosovo” gjatë koncertit hapës të Forumit të Zgjerimit të BE-së në Bruksel.

Në një prononcim për gazetarët më 16 nëntor, Kos theksoi se përzgjedhja e këngës nga muzikantët nuk pasqyron në asnjë mënyrë qëndrimet e Komisionit Europian. Melodia u interpretua më 15 nëntor, gjatë koncertit “Meloditë e unitetit”, ndërsa vargjet e këngës nuk u kënduan, por titulli u shfaq në ekran.

Përfshirja e saj në aktivitetin zyrtar shkaktoi reagime nga zyrtarët e Kosovës dhe përfaqësues të Parlamentit Europian, të cilët kërkuan shpjegime për përzgjedhjen e repertorit.


Video